தொடக்கமே ஒரு துயரக் கதை….. இவர்களை இந்தியாவிலிருந்து வஞ்சகமான முறையில் அழைத்து வந்தபோது, இவர்கள் அனுபவித்த துயரங்கள் அமெரிக்காவுக்கு அடிமைகளாக நீக்ரோக்கள் பிடித்துச் செல்லப்பட்டபோது, அவர்கள் அனுபவித்த துயரங்களுக்கு எவ்விதத்திலும் குறைவானதல்ல. தங்களுடைய கிராமங்களில் இருந்து இராமேஸ்வரத்திற்கும் தட்டைப்பாறைக்கும் (தொண்டிக்கருகில்) வழியெல்லாம் நடந்தே வந்தனர். வழியில் தாம் கொண்டு வந்த உடமைகளை பல சமயங்களில் திருடர்களிடம் பறிகொடுத்து வெறுங்கையோடு, வள்ளங்கள் மூலம் இலங்கைக்கு வந்து சேர்ந்தனர். தலைமன்னாரிலிருந்து அல்லது அரிப்பிலிருந்து, வனாந்தரங்களில், வனவிலங்குகளின் அச்சுறுத்தலுக்கும், மலேரியா நோயின் பயங்கரத்திற்கும் நடுவே அவர்கள் போதிய உணவோ, உடையோ இன்றி பல வாரங்கள் தொடர்ந்து நடந்தனர். அவர்கள் பிரயாணம் செய்த பாதையில் பல இடங்களில், பல மைல் தூரத்திற்கு நீர் கிடைக்காது வழியில் செத்து மடிந்தோரின் சடலங்கள் வனவிலங்குகளுக்கு உணவாக விடப்பட்டன. தாய்மார் இறந்த பல சமயங்களில், அவர்களது கைக்குழந்தைகளும் அவர்களது பிரேதத்தின் அருகே நிராதரவாக விட்டுச் செல்லப்பட்டன……