இன்றைய வாசகர் பலருக்கும் அறிமுகமாகி இருக்க வாய்ப்பில்லாத வாழ்க்கையைப் பேசுகிறார் ஏக்நாத் . இது அவரது எழுத்தின் சிறப்பு , வசீகரம் . இவர் சொல்லும் சம்பவங்கள் , கதைகள் நவப்பட்டுப் போன இளைய வாசகர்களுக்கு வியப்பை ஏற்படுத்தக் கூடும் . இந்திய கிராமங்களின் வாழ்க்கையை நகர்மயமானவர் புரிந்துகொள்வதில் இருக்கும் சிக்கல் அது . அவர் பயன்படுத்தும் சொற்களைக் கொண்டே சிறியதோர் அகராதி தொகுக்கலாம் . சில படைப்பாளிகள் சொற்களை , மிரட்டும் தத்துவக் கருவிகளாகவும் , கோட்பாட்டுக் குத்துவாள்களாகவும் பயன்படுத்துவதுண்டு . ஆனால் , இயல்பான சொற்களில் , கிராமத்து மக்களின் வாழ்க்கையைப் பதிவு செய்கிறார் ஏக்நாத் ..

-நாஞ்சில் நாடன்

கூறியது கூறல் ‘ , ‘ போலச் செய்தல் ‘ இவையிரண்டையுமே மறுதலித்து மேலெழும் சுந்தர ராமசாமியின் படைப்புலகின் ஆகச் சிறந்த கதைகளின் தொகுப்பு இந்நூல் .

யதார்த்தக் கதைகளின் வழியே வாசகனை மனவிரிவுக்கு உட்படுத்தும் அதேவேளையில் மொழியழகோடு கூடிய அபூர்வமான சொல்லாட்சிகள் மூலம் கவித்துவத் தருணங்களைத் தேர்ந்த இசைக் கலைஞனைப்போல ஸ்ருதி பிசகாமல் மீட்டும் சு.ரா , நேற்றின் வழித்தடத்திலிருந்து விலகி புதியக் கருக்களைத் தேடிக் கண்டடைந்து முன்னோக்கிச் சென்ற பயணத்தை துலக்கமாக வெளிப்படுத்தும் தொகுப்பு இது . அவர் வரிகளின் இடையே விட்டுச் செல்லும் மௌன இடைவெளிகளைச் சுயஆற்றலால் இட்டு நிரப்பிக்கொள்ளும் வாசகன் தன் மனச்சுனைகளைப் பெரும் மன எழுச்சியோடு கண்டுகொள்கிறான் .

எழுத்தாளனின் “ உள்ளொளி இருளில் மிருகங்களின் கண்கள் போல் பரவசம் ஊட்டக் கூடியது ” என்று சு.ரா. எழுதினார் . அந்த உள்ளொளியை நம்பி ஏற்றுச் செயல்பட்ட ஒரு படைப்பாளியின் மகத்தான கதையுலகம் இது .