உழவுத் தொழில் நொடிந்த நிலையில் , ஒரு பிரதேசமே கைவிடப்பட்ட சூழலில் , செயற்கையான உரங்களாலும் , பூச்சிக் கொல்லிகளாலும் மண்ணே மலடான தருணத்தில் – ஒரு மீட்பர் போல , ஒரு தேவதை போலத் தோன்றி , அந்தப் பிரதேசத்துக்கே புத்துயிர் கொடுத்த உழவர்களின் அசாதாரணக் கதைகளே இந்தப் புத்தகம் .

இந்த மண் மீதும் , மனிதர்கள் மீதும் கொண்ட அக்கறையினால் இயற்கை விவசாயத்தை நம்பிக் களமிறங்கி , அவமானங்களைப் புறக்கணித்து , தோல்விகளை விழுங்கி நிமிர்ந்து , நின்று போராடி , பசுமையை மீட்டெடுத்து வென்ற எளிய , வலிய மனிதர்கள்தாம் இவர்கள் . தாம் இயங்கும் சமூகத்தையும் இயற்கை விவசாயத்தின் வழியில் கைதூக்கிவிட்ட வயக்காட்டுப் போராளிகள் . நம் மண்ணில் மட்டுமல்ல – தேசங்கள் தோறும் , கண்டங்கள் தோறும் அர்ப்பணிப்புடன் இயங்கிக் கொண்டிருக்கும் மாண்புமிகு இயற்கை விவசாயிகளை இங்கே சந்திக்கலாம் .

இயற்கையோடு இணைந்த இவர்களது வெற்றி , பசுமையான எதிர்காலத்தின் மீதான நம்பிக்கையை இன்னும் மிச்சம் வைக்கிறது . நாளைக்கும் நம் சந்ததிக்கும் நல்ல , ஆரோக்கியமான உணவு கிடைக்கும் என்ற ஆசையைத் தக்க வைக்கிறது . மாற்றம் , நம் மனத்தில் இருந்துதான் உண்டாக வேண்டும் என்ற பேருண்மையை உரக்கச் சொல்கிறது .

இந்த மாண்புமிகு விவசாயிகள் நம் மனத்தில் உண்டாக்கப் போகும் மாற்றம் மகத்தானது !