பூமியில் இருந்த புல்வெளிகள் யாவும் சூழல்சீர்கேட்டில் மறைந்து போய்விடவே தனது ஆடுகளை ஒட்டிக் கொண்டு வானில் மேய்ச்சலுக்குப் போகிறான் ஒரு கிழவன் . பறந்து திரியும் ஆடுகளும் அதன் பயணங்களும் நமக்கு விந்தையான அனுபவத்தைத் தருகின்றன . களங்கமில்லாத மனநிலையைக் குறிக்க ஆட்டுக்குட்டியை குறியீடாகச் சொல்வார்கள் . குழந்தைகள் துள்ளித் திரியும் ஆட்டுக் குட்டிகளைப் போலவே உலகை வலம் வருகிறார்கள் . இக்கதை சிறார்களை மட்டுமில்லை பெரியவர்களையும் வானில் பறக்கவே செய்கிறது .

கல்லூரியில் தமிழ் இலக்கியம் படித்த இளைஞன் தன் வாழ்நாளில் சந்திக்கும் போராட்டங்களும் அவலங்களும் புற க்கணிப்புகளும் சமூகம் அவனைத் துரத்தி வேட்டையாடியதுமே நாவலின் பிரதான களம் . சம்பத் என்ற இளைஞனுக்குத் துணை நின்ற நண்பர்களின் நினைவுகளின் வழியே சம்பத்தின் ஆளுமையைப் பற்றிப் பேசுகிறது உறுபசி . எதிர்காலம் குறித்த பயமும் கேள்விகளும் கொண்ட இளைஞனின் அவல வாழ்க்கையை உக்கிரமாகப் பதிவு செய்துள்ளது உறுபசி . அவ்வகையில் இது தமிழ் நாவல் உலகில் தனித்துவமிக்கப் படைப்பாகக் கொண்டாடப்படுகிறது .